LIPPERT'S JOSEP
Horst Hohl, Kastellaun (Hunsrück)


En Original von seltener Art

war Lippert's Josep, dä met däm Bart.
En Bär vonem Kerl, en gut Gemiet,
net domm on net zwerich on mäßt gut gelieht,
on doch war er annerscht wie annere Läit,
en Sonnerling, däm us Kultur näißt bedäit.

De linkse Stiewel am rechtse Fuß
de rechts am linkse weil dat dann so muß
on de annere Daach hat er richtig se an,
worom, wollt ich wesse, do her ich en sahn:
so ebbes dat wäß doch en jeder Depp
sonst laaf ich die Absätz en korzer Zäit
schepp.
Er ging off de Hannel met Wetzstän on Knepp
Rasierklinge, Schuhrieme, Schuhnähl met Käpp
met Kichemesser on Schuhfett on Wichs,
on wer näißt woll kaafe vor dän harrer nix.

Säi War' die war billig, gering seine Notze.
Met jo on met na, so geret am flotzte,
en Penning zu viel, den wollt er net behalle
on wer näißt hillt, brouch aach näißt se
bezahle.

So kam er, so ging er, Johr for Johr,
en Joch, on zwee Kereb, en Karre defor,
en Schubkarre waret, en Wasserjoch
on do dran die Kereb, so siehn ich en noch.

En der Kereb die Schachtele, kläne on große
on kläne ous Blech for et Geld drinn selose.
En ähner die Grosche, for die Penning en anner,
die Marike hat er noch extra beinanner.
Et hat alles säi Ordnung, wenn aach en besonner.

Geroch hot er net gut on dat war kä Wonner.
Zwo Bochse, zwee Jacke on die offenanner,
et Hemd vore off bis zum Gertel enonner,
en Moul voll Tubak, den hot er gepriemt,
de Sutter ein Bart, dovor war er beriemt.


Zurück zur Roscheider-Hof-Homepage